My voete is yskoud waar ek in die sonnnetjie sit by my eetkamertafel op die plaas. Ek het vandag my kantoor begin uitsorteer wat al vir twee jaar pakkamer is en ek kan nie help om te wonder watter kleur ek oor die donkergrys mure wil verf wat eens op 'n tyd vir my mooi was nie. Ek sien uit om weer terug te trek met al my los papiere en sommer nuwe lewe in my studio te blaas. Hierdie was my "war room" waar ek kon Bybel lees en bid sonder kind of kraai wat iets kom vra en ek sien uit om weer hierdie heilige grond te betree en net weer nader aan my Vader se teenwoordigheid te kom.. te leer en te groei en los te maak en agter te laat..
Ons hoofstikser het verlede week my gunsteling linnebroek wat ek voos gedra het, losgetorring om vir my 'n nuwe broek te maak en hier begin 'n nuwe gogga my byt.. Want toe krap ek sommer die sweetpaktop patroon uit wat ek al drie jaar terug gekoop het en ons maak sommer vir my tops.. let wel, dis die lekkerste broek en tops wat ek in 'n laaaaang tyd gehad het.. Ek wil so graag klere maak vir mammas en dogtertjies, maar ek kan nie dit en die babaklere saam doen nie.. Ek weet nie regtig hoe en wat om te maak nie, maar die tyd sal leer, want die babaklere lê my ook baie na aan die hart..
Die 20ste Julie is Hartsgoed op Kwêla en stel ons 'n splinternuwe Hartsgoed aanlynwinkel bekend.. die 22ste begin die skool.. die naweek van die 26ste Julie moet ek ons Hartsgoed winkel gaan oppak in Buffeljagsrivier en iewers plek maak vir al die voorraad en kaste en rakke.. Ek droom al van al daai mooi rakke en kaste vir ons studio op die plaas en hoe lekker ek al daai mooi mandjies in my huis gaan gebruik.. maar met die oppak moet ek ook vir oulaas twee vroue in die oë kyk wat 'n pad met Hartsgoed geloop het en vir wie 'n nuwe seisoen ook nou wag.. vol onsekerheid, maar met die vaste wete dat die Here ook met hulle sal wees..
Intussen het ek 'n paar rand gespaar om ons dorpshuis se leefvertrek te verf, maar die vloer is so lelik en om die vloer te vervang kos 'n nuwe klein huisie se geld en lê my moed sommer in my skoene, want ek wil net daar ook so bietjie nesskrop en mooi maak, maar ek wag nou al byna drie jaar.. nog 'n bietjie wag sal my seker niks maak nie, maar vir my wat lief is vir mooimaak, is die "nog 'n bietjie wag" 'n bitter pil om te sluk. En ek kan nie die mure en kaste verf voordat ek nie die vloer gedoen het nie, want anders kos alles my dubbeld.. Ek het die mooiste prentjies wat ek daar wil doen.. maar, ek spaar seker dan maar nog 'n bietjie.. want my oortokke rekening van al die bouery met winkel en gastehuis is uiteindelik so te sê afbetaal en ek kan nie wag om 'n slag nie in die skuld te wees nie.. Oja, en terwyl ek nou al twee jaar wag om te verf en mooi te maak, kan ek nie besluit watter van my Hartsgoed lappe moet ek gebruik vir kombuisblindings en 'n gordyn by die eethoekie nie..
Vir die eerste keer in 'n baie lang tyd het ons kans vir voorraad bou vir die aanlynwinkel sodat ons 'n bemarker kan aanstel om ons aanlynwinkel te groei en ek het nie 'n idee wat om te verwag met ons Kwêla uitsending nie. Gelukkig weet ek my Vader weet en Hy sal voorsien..
Ek het ook die mooiste idees vir nuwe kinderlappe en wil graag weer kinderbeddegoed doen met bypassende kussings in sagte pastel kleure met 'n plattelandse gevoel.. Iewers in my voorgeslagte moes 'n Engelse tannie wees wat bitter lief was vir blommelappe en huis mooi maak.. Ek raak kinderlik opgewonde as ek dink aan die nuwe deel van die besigheid waar ek graag konsultasies wil doen en so bietjie "interior design" vir die wat al bietjie langer gespaar het as ek..
Ek wens die laaste paar dae van die vakansie kan staaaaaadig uitloop, want die saamwees as gesin onder een dak en die vrede en stilte en arms vol mooi lammertjies wat aangekom het is vir my kosbaar.. Die vakansie is vir my goed en ek sien kans vir die tweede helfte van die jaar.. mag sy pas so bietjie sstadiger wees en ek hom letterlik en figuurlik ligter instap..
Tot ons weer gesels..